Мемлекет басшысы Қасым-Жомарт Тоқаев АҚШ-тың 47-ші Президенті Дональд Трампқа құттықтау жеделхатын жолдады, — деп хабарлайды Massaget.kz тілшісі Ақордаға сілтеме жасап.
«Мемлекет басшысы Қасым-Жомарт Тоқаев АҚШ-тың 47-ші Президенті Дональд Трампқа жеделхат жолдап, оны 20 қаңтарда Вашингтонда өткен ұлықтау рәсімінде АҚШ Президенті қызметіне ресми түрде кірісуімен құттықтады», — делінген хабарламада.
Жеделхатта Қазақстан мен Америка Құрама Штаттарының энергетика, ядролық қаруды таратпау және халықаралық қауіпсіздік салаларындағы өзара тиімді ынтымақтастығы одан әрі табысты дамитынына сенім білдірілген.
Еске салайық, бүгін 20 қаңтарда АҚШ-тың сайланған президенті Дональд Трамптың ресми ұлықтау рәсімі өтіп жатыр.
Американдық порталдардың жазуынша, Трамптың ұлықтау рәсіміндегі сөзі ең ұзақ болды. C-Span есептеулеріне сәйкес, президент Трамптың сөзі шамамен 29 минутқа созылды.
Трамптың 8 жыл бұрынғы алғашқы ұлықтау рәсіміндегі сөзі 16 минуттан сәл асқан болатын.
