Тіл – ұлттың жаны, елдіктің негізі. Қазақстан Республикасының мемлекеттік тілі – қазақ тілі. Конституцияның 7-бабында қазақ тілі – мемлекеттік тіл екені айқын көрсетілген. Бұл – әрбір азаматқа, әсіресе мемлекеттік қызметкерлерге үлкен жауапкершілік жүктейді.
Сот жүйесінде қызмет атқаратын маман үшін тіл мәдениеті – кәсіби біліктіліктің бір бөлігі. Құжаттарды сауатты рәсімдеу, ресми хаттармен жұмыс, тараптармен түсінікті әрі нақты сөйлесу – бәрі де тілді меңгеру деңгейімен тікелей байланысты.
Сот төрелігін жүзеге асыруда тіл тек қатынас құралы ғана емес, әділеттіліктің діңгегіне айналады. Себебі заңды түсінікті жеткізу, тараптардың уәждерін дәлме-дәл баяндау, шешімді айқын жазу – сот қызметкерінің тілді дұрыс қолдануына тәуелді.
Мемлекеттік тілді құрметтеу – әрбір сот маманының парызы. Тілге деген құрмет – елге, заңға деген құрмет. Сондықтан тіл мәдениетін арттыру, заңнамалық терминдерді дұрыс пайдалану және сөйлеу әдебін сақтау – кәсіби шеберлікті шыңдай түседі.
Ақтөбе қаласының әкімшілік
құқық бұзушылықтар жөніндегі
мамандандырылған ауданаралық
сотының бас маманы Райхан Жекебаева