25 қазан – Республика күнін Алматы қаласындағы Тергеу изоляторындағы шаруашылық жасағындағы сотталғандар ерекше атап өтті. «Жасыл ел», «Бәйтерек», «Қызыл алма» деп атау қойған үш командаға бөлінген сотталғандар Республика жетістерін көрсету мақсатында өзара сайысқа түсті.
Жарысқа қатысушылар бірінші турда командаларын мағыналы сөздермен таныстырса, екінші турда өз өнерлерін көрсетті. Ал үшінші турда берекелі күздің белгісі – жеміс-жидектерден түрлі бейнелер жасап, өз шеберліктерін ортаға салды.
Алматы қаласы бойынша ҚАЖД Ардагерлер кеңесінің төрағасы Е.Сағалбаев жетекшілік еткен әділқазылар шешімімен «Бәйтерек» командасы жеңімпаз деп танылып, «Magzona» дүкенінің директоры Айбек Дәуренұлының атынан бағалы сыйлыққа ие болды. Басқа командаларға мекеме бастығының Алғыс хаттары табысталды.
Еліміздің басты мерекесі – Республика күнінің құрметіне арналған жарысты мағыналы өткізуге ат салысқан барлық команда мүшелеріне Алматы қаласы бойынша ҚАЖД №72 мекемесінің бастығы әділет подполковнигі Рахат Сәбитұлы Нұрбеков олардың тезірек бостандыққа шығып, отбастарына оралуларына тілектестік білдірді.
