АҚШ-тың Техас штатында су тасқынынан қаза тапқандар саны 81 адамға жетті, тағы ондаған адам із-түзсіз жоғалғандар қатарында, — деп хабарлайды Massaget.kz тілшісі NBC News-ке сілтеме жасап.
АҚШ Ұлттық метеорологиялық қызметінің мәліметінше, Кервилл қаласы маңындағы Гвадалупе өзенінің деңгейі толассыз жауған жаңбырдан кейін 6-8 метрге дейін күрт көтерілген. Салдарынан жолды ағызып, елді мекендерді су басты.
Тек Керр округінде 68 адамның қаза тапқаны расталды. Олардың ішінде 40 ересек пен 28 бала бар. Билік мәліметінше, Camp Mystic жазғы лагерінің 10 тәрбиеленушісі әлі табылған жоқ.
Синоптиктер алдағы тәуліктерде жауын-шашынның әлі де мол түсетінін айтып, жаңа су тасқынының қаупі сақталып отырғанын ескертіп жатыр. Осыған байланысты Ұлттық метеоқызмет оңтүстік-орталық Техастың көп бөлігіне арналған су тасқыны туралы ескерту мерзімін ұзартты.
АҚШ президенті Дональд Трамп Керр округінде ауқымды апат режимін енгізу туралы жарлыққа қол қойды. Бұл төтенше қызметтерге қосымша ресурстарға шұғыл қол жеткізуге және құтқару жұмыстарын жедел жүргізуге мүмкіндік береді.
Іздеу-құтқару жұмыстары жалғасып жатыр. Құтқарушылар мен еріктілер аман қалғандарды су басқан аумақтарды мұқият тексеріп жатыр. Билік жергілікті тұрғындарға аса сақ болуға және мүмкіндігінше қауіпті аймақтардан кетуге кеңес беріп жатыр.
Еске салайық, жойқын су тасқыны жұмада таңертең Сан-Антонио қаласынан 140 шақырымдай солтүстік-батыстағы аймақта, Гвадалупе өзенінің арнасынан тасып шығуы салдарынан болды.
