Түркияда енгізілген шектеулер наурыздан бастап жергілікті эпиджағдайға қарай біртіндеп жеңілдей бастайды. Бұл туралы ел президенті Реджеп Тайип Ердоған айтты, — деп хабарлайды РИА Новости.
Бүгінде Түркияда жұмыс күндері және жұма мен дүйсенбі аралығында 21.00-ден 5.00-ге дейін коменданттық сағат енгізілген. Одан бөлек, Түркияда маска тағу және әлеуметтік қашықтықты сақтау режимі бар. Мейрамхана, кафе, түнгі клубтар мен басқа да көңіл көтеруге арналған мекемелер жабық, қоғамдық тамақтану орындары жеткізу қызметі бойынша жұмыс істейді.
«Коронавируспен күрес динамикасы мен біздің жұмысты ескере отырып, наурыздан бастап шектеуді біртіндеп жеңілдетуді бастаймыз. Біз өңірлерді төрт категорияға бөлдік. Осы топтар бойынша жеке шешім қабылданады», — деді Ердоған.
Оның сөзінше, Түркияда коронавирусқа қарсы вакцина 5,5 миллион адамға салынған.
