Қарты бар елдің-қазынасы бар. Олардың орны әрқашан төрде. 1-қазан Қарттар күні қарсаңында, Төлеби ауданының әкімі Төлеген Телғараев бастаған, полиция басшысы Руслан Ендібаев, басқа да мекеме басшылары бірге жұмыс күнін үлкендерге ерекше көңіл-күй сыйлап, құрмет көрсетуден бастады. Яғни өмірден көргені мен түйгені мол асыл әжеміз бен ақсақалды қариямызды арнайы мерекелерімен құттықтап, қал-жағдайларын біліп қайтты.
Атап айтсақ, ауданның өсіп өркендеуі жолында еңбек етіп, бүгінде бейнетінің зейнетін көріп отырған қазыналы қарияларымыз, ҰОС-ның ардагері Рысмет ата мен тыл еңбеккері Майдан апаға ізгі тілектерін жеткізіп, естелікке сый-сияпат тапсырды.
«Сіздер елдің тыныштығы мен тұтастығы, бірлігі мен берекесінің сақталуына қосқан үлестеріңіз зор. Сіздердің үлгі-өнегелеріңіз біз үшін баға жетпес байлық болып саналады. Ұзақ жасаңыздар, дендеріңіз сау болсын»-деген ақжарма тілектер айтылды. Соңында қарияларымыз қызметте жүрген ұл-қыздарына ақ батасын берді.
Түркістан облысы ПД баспасөз қызметі
