Тәжікстанның шығысындағы жер сілкінісі салдарынан үш жасар бала қаза тапты, 30 үй, соның ішінде бір мектеп қирады. Бұл туралы елдің Төтенше жағдайлар және азаматтық қорғаныс комитетінің Дағдарыс кезіндегі басқару орталығы өкілдері мәлімдеді, — деп хабарлайды Massaget.kz тілшісі Sputnik Тәжікстан басылымына сілтеме жасап.
«Тәжікстанның шығысындағы Рашт ауданындағы жер сілкінісі салдарынан үш жасар бала қаза тапты, оны үйдің қабырғасы басып қалған», — деп жазылған хабарламада.
Айта кетейік, 13 сәуірде Тәжікстанның шығысында үш жер сілкінісі болды. Тәжік сейсмологтарының мәліметтері бойынша біріншісі жергілікті уақыт бойынша 09:24-те, екіншісі 12:14-те, үшіншісі 13:33-те болған.
Еуропалық-Жерорта теңізі сейсмологиялық орталығының (EMSC) мәліметтері бойынша бірінші жер сілкінісінің магнитудасы 5.9, екіншісінікі 4.2, үшіншісінікі 4.7 болды.
Барлық жер асты дүмпуі Душанбенің солтүстік-шығысындағы Рашт ауданы аумағында, Тәжікстан астанасына дейін 158-ден 163 шақырымға дейінгі қашықта тіркелген.
Тәжікстандағы жер сілкінісі Астанада, Таразда, Кентауда, Түркістанда және оңтүстік Қазақстанның 20-дан аса басқа елді мекенінде, сондай-ақ, Өзбекстан мен Қырғызстанда сезілген.
