Тіл – ұлттың жаны, халықтың болмысы мен рухани байлығының айнасы. Әрбір халықтың ең қастерлі байлығы – оның ана тілі. Себебі тіл арқылы ұлттың тарихы, мәдениеті, салт-дәстүрі мен дүниетанымы ұрпақтан ұрпаққа жалғасады. Қазақ тілі – осындай қасиетті де қастерлі мұра, халқымыздың мәңгілік рухани тірегі.
Қазақ тілі – Қазақстан Республикасының мемлекеттік тілі. Бұл мәртебе тіліміздің қоғам өміріндегі орнын айқындап қана қоймай, ел бірлігінің де басты кепілі болып отыр. Тәуелсіздік жылдарында мемлекеттік тілдің қолданыс аясын кеңейту, оның беделін арттыру бағытында көптеген игі істер атқарылды. Мемлекеттік қызметте, білім беру саласында, бұқаралық ақпарат құралдарында қазақ тілінің үлесі жыл сайын артып келеді.
Ана тілін құрметтеу – туған жерді, елді сүюмен тең. Тілін ұмытқан ұлт – өз болмысынан айрылады. Сондықтан әрбір азамат өз тілін қадірлеуді балалық шақтан бастап үйренуі қажет. Қазақ тілі – тек қарым-қатынас құралы ғана емес, ол – халқымыздың өмір сүру философиясы мен дүниетанымының көрінісі. Елбасы айтқандай, «Мемлекеттік тіл – барша қазақстандықтарды біріктіретін басты фактор».
Бүгінгі жастар – тіл болашағының кепілі. Қазақ тілін заманауи технология, ғылым және мәдениет тіліне айналдыру – жастардың міндеті. Тіл мәдениетін сақтау, сөз құдіретін түсіну – әрбір саналы ұрпақтың парызы. Әлеуметтік желілерде, бұқаралық ақпаратта таза, сауатты қазақ тілін қолдану – тілдің беделін арттыратын нақты қадам.
Қазақ тілінің тұғыры биік болуы – баршамыздың ортақ ісіміз. Мемлекеттік тілде сөйлеу – ұлтқа деген құрметтің, елге деген сүйіспеншіліктің көрінісі. Тілге жанашырлық танытқан ел ғана өз рухын биік ұстай алады. Сол себепті туған тілімізді сақтау, дамыту және ұрпаққа аман жеткізу – біздің азаматтық борышымыз.
Тұғыры биік туған тіл – ұлттың мәңгілігінің кепілі. Қазақ тілінің абыройын асқақтатып, оның қолданысын кеңейту – әрбір қазақстандықтың қасиетті міндеті. Ана тілін ардақтай білген елдің рухы ешқашан әлсіремейді.
Қызылорда қаласының ӘҚБ сотының
бас маманы Л.Шаймова
