Сыбайлас жемқорлық – қоғамның тұрақты дамуына кері әсер ететін, мемлекеттік басқарудың тиімділігіне нұқсан келтіретін күрделі әлеуметтік құбылыс. Онымен күресу тек мемлекеттік органдардың ғана емес, қоғамның әрбір мүшесінің ортақ міндеті болып табылады.
Мемлекеттің дамуы мен халықтың әл-ауқаты заңның үстемдігіне, әділдік пен ашықтық қағидаттарының сақталуына тікелей байланысты. Осы тұрғыдан алғанда, сыбайлас жемқорлықтың алдын алу және оған жол бермеу бағытындағы жұмыстардың маңызы ерекше.
Сот жүйесінде сыбайлас жемқорлыққа қарсы іс-қимылдың негізгі қағидаларының бірі – заңдылық пен әділдікті қамтамасыз ету. Сот қызметкерлері өз міндеттерін орындау барысында адалдықты, жауапкершілікті және кәсіби әдепті басшылыққа алуы тиіс. Әрбір азаматтың құқықтары мен заңды мүдделерін қорғау кезінде қандай да бір заңсыз әрекетке жол берілмеуі қажет.
Сыбайлас жемқорлықтың алдын алуда ашықтық пен жариялылықтың да орны ерекше. Қазіргі таңда мемлекеттік органдардың қызметін цифрландыру, электрондық жүйелерді кеңінен қолдану адам факторының әсерін азайтып, қызмет көрсету сапасы мен ашықтығын арттыруға мүмкіндік беріп отыр.
Сонымен қатар сыбайлас жемқорлыққа қарсы мәдениетті қалыптастыруды бала кезден бастап қолға алу маңызды. Өйткені адалдық, еңбекқорлық, заңды құрметтеу және жауапкершілік сияқты құндылықтар қоғамның тұрақты дамуының негізін қалайды.
Әр азамат өз қызметіне жауапкершілікпен қарап, заң талаптарын сақтап, сыбайлас жемқорлық көріністеріне бейжай қарамауы қажет. Заң бұзушылыққа немқұрайлы қарау оның одан әрі таралуына себеп болуы мүмкін. Сондықтан қоғамда «сыбайлас жемқорлыққа жол жоқ» деген ұстаным қалыптасуы тиіс.
Сыбайлас жемқорлықпен күрестің нәтижелі болуы мемлекеттік органдардың жұмысына ғана емес, әр адамның құқықтық сауаттылығы мен азаматтық жауапкершілігіне байланысты. Адалдық пен заңдылықты берік ұстану арқылы ғана әділетті, ашық әрі сенімді қоғам қалыптастыруға болады.
Сыбайлас жемқорлыққа қарсы күрес – белгілі бір кезеңмен шектелетін жұмыс емес, тұрақты түрде жүзеге асырылуы тиіс маңызды бағыт. Осы жолда әрқайсымыз өз міндетімізді адал атқарып, заң талаптарын сақтауға және қоғамдағы адалдық қағидаттарын нығайтуға үлес қосуымыз қажет.
Б.Хашимжанов, Шымкент қаласының мамандандырылған ауданаралық әкімшілік сотының бас маман-сот отырысының хатшысы
