Қазақстан Республикасының Конституциясында қазақ тілі мемлекеттік тіл мәртебесіне ие екендігі айқындалған. Сот төрелігін жүзеге асыруда мемлекеттік тілдің қолданылуы – ұлттық құқықтық жүйенің басты талаптарының бірі. Әсіресе азаматтық сот ісін жүргізу барысында мемлекеттік тілдің қолданысы азаматтардың құқықтарын толық көлемде қамтамасыз етуге және әділ сотқа қол жеткізуге ықпал етеді.
Азаматтық процесте тараптардың арыз-шағымдары, талап-өтініштері мен түсініктемелері мемлекеттік тілде ресімделуі – сот ісін жедел әрі тиімді қараудың маңызды алғышарты. Бұл ретте сот отырысының мемлекеттік тілде өтуі тараптардың теңдігін сақтауға, құқықтық мәдениетті арттыруға және ұлттық заңнаманы дамытуға жағдай жасайды. Сонымен қатар, сотта аударма қызметінің қажеттілігін азайтып, уақыт пен материалдық ресурстарды үнемдеуге мүмкіндік береді.
Сот төрелігін мемлекеттік тілде жүзеге асыру тек құқықтық міндет қана емес, сонымен бірге қоғам алдындағы жауапкершілік болып табылады. Азаматтардың мемлекеттік тілде еркін сөйлеуі мен өз құқығын қорғауы – ұлттық бірлікті нығайтып, сот билігінің беделін арттырады. Осыған орай сот жүйесінің қызметкерлері мен судьялардың кәсіби біліктілігімен қатар, мемлекеттік тілді жетік меңгеруі – әділдікті қамтамасыз етудің негізгі шарты болып саналады.
Қорытындылай келе, азаматтық сот өндірісінде мемлекеттік тілдің басымдығын қамтамасыз ету – құқықтық мемлекеттің нығаюына, сот төрелігінің ашықтығы мен қолжетімділігінің артуына ықпал ететін маңызды бағыт. Бұл міндеттің орындалуы еліміздің демократиялық қағидаттарын нақты жүзеге асыруға мүмкіндік береді.
Ақтөбе қалалық соты әкімшісінің Асланбек Бақтыгереев
бас маманы-сот отырысының хатшысы
