Қазіргі қоғамда цифрлық технологиялар өміріміздің барлық саласына еніп, мемлекеттік қызметтердің сапасын арттыруға айтарлықтай ықпал етуде. Осы бағыттағы маңызды қадамдардың бірі – Қазақстан Республикасының сот жүйесінде енгізілген «Сот кабинеті» электрондық сервисі.
«Сот кабинеті» – азаматтар мен заңды тұлғаларға сот органдарымен онлайн форматта өзара әрекеттесуге мүмкіндік беретін ақпараттық жүйе. Аталған сервис сотқа жүгіну процесін жеңілдетіп, уақыт пен қаржылық шығындарды азайтуға бағытталған.
Бүгінгі таңда «Сот кабинеті» арқылы талап арыздар, өтініштер, шағымдар және басқа да процессуалдық құжаттарды электрондық түрде жолдауға болады. Сонымен қатар, сот істерінің қаралу барысын қадағалау, сот актілерімен танысу, сот отырысының уақыты туралы хабарламалар алу мүмкіндігі қарастырылған.
Бұл, әсіресе, уақытын үнемдегісі келетін азаматтар мен шалғай елді мекендерде тұратын тұрғындар үшін үлкен қолайлылық болып табылады. Сотқа бірнеше рет барудың қажеттілігі азайып, көптеген мәселелер қашықтан шешіледі.
«Сот кабинеті» сот процесінің ашықтығын арттыруға да ықпал етеді. Әрбір пайдаланушы өз ісінің қай сатыда тұрғанын нақты көре алады. Бұл сот жүйесіне деген сенімді күшейтіп, азаматтардың құқықтық мәдениетін арттыруға мүмкіндік береді.
Сонымен қатар, электрондық құжат айналымының енгізілуі қағазбастылықты азайтып, сот қызметкерлерінің жұмысын оңтайландырады. Нәтижесінде істерді қарау мерзімі қысқарып, сот төрелігі неғұрлым жедел жүзеге асырылады.
Мамандардың пікірінше, цифрлық сервистерді енгізу адам факторын азайтып, сыбайлас жемқорлық тәуекелдерін төмендетуге ықпал етеді. «Сот кабинеті» де осы бағытта маңызды рөл атқарады. Барлық әрекеттер электрондық жүйеде тіркелетіндіктен, процессуалдық тәртіптің сақталуы қамтамасыз етіледі.
Қорытындылай келе, «Сот кабинеті» – бұл сот жүйесіндегі жай ғана техникалық жаңалық емес, ол азаматтардың құқықтарын қорғауды жеңілдететін, сот төрелігінің қолжетімділігі мен ашықтығын арттыратын маңызды құрал. Заманауи талаптарға сай бұл сервис құқықтық мемлекетті қалыптастыру жолындағы нақты әрі тиімді қадам болып табылады.
Шымкентқаласының мамандандырылған ауданаралық әкімшілік сотының бас маманы Б.Қ.Сайлау