Шығыс Қазақстан облысында құтқарушылар ен далада жоғалып кеткен екі адамды тапты
13 қаңтарда Катонқарағай ауданында 1982 және 1988 жылғы екі ер адам Ново-Хайрузовка ауылынан Алыбай ауылына қарай «ВАЗ 2114» көлігімен жолға шыққан. Алайда жол жөнекей көлік қарға батып қалды.
«№27 өрт сөндіру бөлімінің қызметкерлері мен полицейлер бірден оларды іздестіруге кіріскен. Сөйтіп олар сағат 21.30-да Ново-Хайрузовка мен Алыбай ауылдары арасындағы тасжолдан 15 шақырымдай жерден табылды. Алғашқы медициналық көмек көрсету үшін ер адамдар орталық аудандық ауруханаға жеткізілкен. Азаматтардың айтуынша, көлік ішінде тоңып қалмас үшін олар қағаз жағып отырған», — деп хабарлады ШҚО Төтенше жағдайлар департаментінің баспасөз қызметі.
Осы ретте, ТЖД тұрғындарға алыс сапарға шығар алдында жолдардың жай-күйін «Дәрмен» мобильді қосымшасы арқылы тексеріп отыруға кеңес береді.
Талғатжан МҰХАМАДИЕВ
Шығыс Қазақстан облысы
