Сапалы білім беру арқылы бәсекеге қабілетті мамандар даярлау басты мақсатымыз

    Әл-Фараби атындағы Қазақ ұлттық университеті еліміздің білім беру саласының көшбасшысы ретінде өзінің стратегиялық міндеттерінің бірі – сапалы білім беру. Сапалы білім әрбір студентке қажетті теориялық білімді, кәсіби дағдыларды, сондай-ақ өзін-өзі жетілдіру мен әлеуметтік тұрғыдан белсенді болуды қамтамасыз етеді. БҰҰ-ның бастауымен алғаш рет «тұрақты даму» концепциясы ұсынылды. «Тұрақты даму мақсаттары» – қазіргі уақыттың қажеттілігін қамтамасыз ете отырып, болашақ ұрпақтардың өзінің қажеттіліктерін қамтамасыз етуіне қауіп туғызбайтын даму.Тұрақты даму мақсаттары  концепциясының 4 бөлімі –«сапалы  білім» екен алға тартқым келеді.Бүгінде ҚазҰУ тек Қазақстанда ғана емес, сонымен қатар халықаралық аренада да жоғары оқу орындарының беделді орталықтарының біріне айналды. Университеттің басты мақсаты – заманауи талаптарға сай білікті мамандарды даярлау, білім беру деңгейін көтеру және Қазақстанның интеллектуалдық, мәдени және әлеуметтік дамуына үлес қосу.Оқу ордамызда  сапалы білім беру міндеті – оқу бағдарламаларын үздіксіз жаңартып, оқытудың заманауи әдістерін қолдану, сондай-ақ студенттерге терең теориялық білім мен практикалық дағдыларды игерту. Қазіргі таңда университетте білім беру жүйесі инновациялық технологияларды және халықаралық тәжірибені ескере отырып құрылып отыр. Әлемдік деңгейдегі білім беру стандарттарына сәйкес келетін оқу бағдарламаларын ұсынады. Жоғары білім беру сапасының жоғары деңгейін қамтамасыз ету мақсатында университетте профессор-оқытушылар құрамының кәсіби біліктілігі мен ғылыми әлеуеті үнемі дамытылып отырады. Жаңартылған оқу жоспарлары мен бағдарламалар университеттің білім беру сапасын арттыруға бағытталған және студенттердің қажетті дағдыларды игеруін қамтамасыз етеді.

     ҚазҰУ-да білім беру тек теориялық біліммен шектелмейді, сонымен қатар ғылыми зерттеулер мен инновацияларға да көп көңіл бөлінеді. Университеттің әрбір студенті ғылыммен танысып, өзінің ғылыми қызығушылықтары бойынша зерттеу жүргізу мүмкіндігіне ие.Білім ошағында көптеген ғылыми жобалар мен стартаптар қолдау тауып, студенттер мен жас ғалымдар үшін жаңа мүмкіндіктер туғызады. Бұл – университеттің сапалы білім беру міндетін жүзеге асырудың тағы бір жолы.Оқу ордамызда жүзеге асырылып жатқан ғылыми зерттеулер мен инновациялық жобалар студенттерге әлемдік деңгейде бәсекеге қабілетті болуға мүмкіндік береді. Ғылыми қызметтің маңызды аспектісі ретінде студенттердің ғылыми және шығармашылық қабілеттерін дамыту да аталып өтеді. Бұл процесс білім мен тәжірибе алмасудың маңызды құрамдас бөлігі болып табылады. ҚазҰУ-дың сапалы білім беру міндетінің маңызды аспектілерінің бірі – түлектердің кәсіби даярлығын қамтамасыз ету. Университет білім беру жүйесін үнемі жаңартып, болашақ мамандардың жұмыс нарығына бейімделуіне ықпал етеді. Сонымен қатар, студенттерге өз саласында тәжірибе алу мүмкіндіктері ұсынылады. Университеттің көптеген факультеттерінде студенттер өндірістік тәжірибеден өтіп, практикалық білімдерін жетілдіріп отырады.Қара шаңырақтың түлектері еліміздегі және шетелдегі жетекші компанияларда, мемлекеттік органдарда, ғылыми орталықтарда және халықаралық ұйымдарда жұмыс істейді. Университеттің түлектері кәсіби деңгейде жоғары бағаланып, олардың біліктілігі мен тәжірибесі болашақта еліміздің дамуына зор үлес қосатыны сөзсіз.

    ҚазҰУ-дың сапалы білім беру міндеті – тек білім беру процесінің сапасын арттырумен ғана шектелмейді, ол сонымен қатар студенттердің әлемдік деңгейдегі білікті маман болып қалыптасуына ықпал етеді. Университетте ғылыми зерттеу, халықаралық ынтымақтастық және кәсіби дайындық сияқты бірнеше аспектілер бірігіп, болашақ мамандардың кәсіби әрі жеке дамуында үлкен рөл атқарады.Университет  сапалы білім беру міндетін орындау арқылы еліміздің  интеллектуалдық әлеуетін арттыруға, қоғамның дамуына, еліміздің халықаралық аренадағы орнын нығайтуға үлес қосып келеді.

Накишева М.К.

Әл-Фараби атындағы  ҚазҰУ-дың заң факультеті кеден, қаржы және экологиялық құқық кафедрасының заң ғылымдарының PhD докторы, аға оқытушысы