Семей қаласындағы футбол алаңында Абай облысы бойынша қауіпсіздігі барынша төмен мекемеде жазасын өтеп жатқан 11 сотталғанның қатысуымен жолдастық футбол ойыны өтті.
Бұл санаттағы мекемелерде жазасын өтеп жатқан сотталғандарға еңбекпен айналысуға, сондай-ақ белгіленген тәртіппен мекеме аумағынан тыс жерде спорттық, мәдени және басқа да қоғамдық маңызы бар іс-шараларға қатысуға мүмкіндік беріледі. Бұл олардың әлеуметтік байланыстарын сақтап, қоғамға одан әрі бейімделуіне қажетті дағдыларды қалыптастыруға ықпал етеді.
Футбол ойыны достық жағдайда өтіп, қатысушылар белсенділік танытып, бір-біріне қолдау көрсетті және командалық рухтарын көрсете білді.
Мекеме бастығының орынбасары, әділет подполковнигі Арман Саржанов атап өтті:
«Сотталғандардың тек еңбекпен айналысып қана қоймай, пайдалы іс-шараларға қатысуы маңызды. Спорт дене дайындығын жақсартуға, тәртіптілік пен өзара әрекеттесу дағдыларын дамытуға көмектеседі».
Ойынға қатысқан сотталғандардың бірі өз әсерімен бөлісті:
«Мұндай іс-шаралар күнделікті жағдайдан бір сәтке алаңдап, уақытты пайдалы өткізуге мүмкіндік береді. Спортпен айналысып, өзіңді команданың бір бөлігі ретінде сезіну өте жағымды. Осындай іс-шараларға қатысуға мүмкіндік берген мекеме әкімшілігіне алғысымызды білдіреміз».
Осындай іс-шараларды өткізу сотталғандардың әлеуметтік белсенділігін сақтауға, салауатты өмір салтын ұстануына және қоғамға бейімделуіне оң ықпал етеді.
