Қазақстандағы Құрылтай сайлауына қатысатын барлық 7 саяси партия өздерінің партиялық тізімдерін жариялады. Бұл – сайлау науқанының маңызды кезеңдерінің бірі. Енді ел азаматтары партиялардың бағдарламаларымен, ұсынған кандидаттарымен және алдағы жоспарларымен жан-жақты таныса алады.
Ал 23 шілде күні сағат 18:01-де ресми түрде сайлауалды үгіт-насихат кезеңі басталады. Осы уақыттан бастап саяси партиялар заң аясында өз бағдарламаларын халыққа таныстырып, сайлаушылармен кездесулер өткізіп, қоғамдық пікірталастарға қатысады.
Алдағы үгіт-насихат кезеңі – саяси бәсекелестіктің, ашық пікір алмасудың және демократиялық мәдениеттің көрінісі болуы тиіс. Әрбір партия өз ұстанымын дәлелдеп, ел дамуына қатысты көзқарасын ұсынады. Ал шешуші сөз – халықтікі.
23 тамыздағы сайлау – еліміздің болашағына бейжай қарамайтын әрбір азамат үшін маңызды таңдау. Сондықтан әрбір сайлаушы партиялардың сайлауалды бағдарламаларын мұқият зерделеп, саналы шешім қабылдауы қажет.
Белсенді азаматтық ұстаным – мықты мемлекеттің негізі. Еліміздің ертеңі үшін әр дауыс маңызды. Өз таңдауыңызды жасап, Қазақстанның болашағына бірге үлес қосайық!
