Солтүстік Қазақстан облысының полицейлері көпшілікті таратуға арналған суатқыш көліктің не үшін сатып алынатынын түсіндірді. Тәртіп сақшыларының айтуынша, «бұл әлемдік тәжірибеде бар жағдай», — деп хабарлайды Tengrinews.kz тілшісі.
«Мұндай техниканы пайдалану — полиция органдарының жалпы әлемдік тәжірибесі. СҚО Полиция департаментінің балансында 15 жылдан аса уақыт бойы тұрған техниканың пайдалану мерзімі аяқталуына және техникалық ақауларына байланысты жаңа көлік құралы сатып алынады», — деп мәлімдеді СҚО ПД тылдық қамтамасыз ету басқармасынан.
Еске салайық, мемлекеттік сатып алу сайтында СҚО полициясының суағар қондырғысы бар көлікті сатып алу туралы хабарламасы пайда болды. Лот бағасы — 124,8 миллион теңге.
