Қазақстанда 2026 жылғы 15 наурызда өткен республикалық референдумның қорытындылары жарияланды. Бұл жайлы Қазақстан Республикасының Орталық референдум комиссиясы мәлімдеді, деп хабарлайды BAQ.KZ.
Ресми мәліметке сәйкес, референдумға қатысу құқығы бар азаматтардың жалпы саны 12 482 613 адамды құрады. Оның ішінде дауыс беруге 9 127 192 азамат немесе 73,12% қатысты.
Дауыс беру нәтижесінде:
7 954 667 адам немесе қатысушылардың 87,15%-ы жаңа Конституцияны қолдап дауыс берді;
898 099 азамат қарсы дауыс берген;
146 558 бюллетень жарамсыз деп танылған.
Орталық референдум комиссиясының мәліметінше, дауыс беруге қатысқан азаматтар саны жалпы сайлаушылардың жартысынан асқандықтан, референдум өтті деп танылды.
Сондай-ақ облыстардың, республикалық маңызы бар қалалардың және астананың кемінде үштен екісінде қатысушылардың басым бөлігі қолдау білдіргендіктен, референдумға шығарылған жаңа Конституция жобасы қабылданды деп есептеледі.
Еске салайық, референдумда азаматтарға «2026 жылғы 12 ақпанда бұқаралық ақпарат құралдарында жарияланған Қазақстан Республикасының жаңа Конституциясын қабылдайсыз ба?» деген сұрақ ұсынылған болатын.
