Қасиетті Рамазан айында құрма, жаңғақ қымбаттай ма? Бұл сауалға Сауда және интеграция министрлігінің басшысы Арман Шаққалиев жауап берді, — деп хабарлайды Massaget.kz тілшісі.
Мәжіліс дәлізінде журналистер Шаққалиевтен министрліктің Рамазан айына арналған жеңілдіктер мен акциялар туралы сауда желілерімен келісімі бар-жоғын және ет, құрма, жаңғақ, сүт өнімдері сияқты тауарлардың бағасын сұрады.
«Мұндай кезде сауда желілері акциялар өткізеді, бағаны төмендетеді, түрлі іс-шаралар жасайды. Бұл — ең бастысы. Сауда желілері бұдан ақша табуға ұмтылмайды, керісінше бұл — жақсылық айы. Міне, бұл уақытта олар бағаны төмендетуге бағытталған түрлі акциялар өткізеді», — деп жауап берді Арман Шаққалиев.
Ораза — 2025 қашан басталады?
Қазақстан мұсылмандары діни басқармасының Шариғат және пәтуа бөлімі Түркі мемлекеттері ұйымына қарасты Мүфтилер алқасы жанындағы Пәтуа кеңесімен ақылдаса келе биыл Рамазан айы басталатын күнді бекітті.
Ортақ пәтуаға сәйкес қасиетті Рамазан айы 1 наурызда басталады.
Рамазан 2025: Қадір түні қашан?
ҚМДБ мәліметінше, 27 наурызға қараған түн — қасиетті Қадір түні. 30 наурыз — Ораза айт мерекесі.
Пітір садақа мөлшері қанша?
Бас мүфти Наурызбай қажы Тағанұлының төрағалығымен өткен Қазақстан мұсылмандары діни басқармасының төралқа мәжілісінде пітір садақа еліміз бойынша екі келі ұнның орташа бағасы негізінде 655 теңге болып бекітілген.
