Қоғамдық жұмысты орындамаған сотталғанның ісі сотқа жолданды

Қызылорда облысы бойынша Қылмыстық-атқару жүйесі департаментінің пробация қызметі сот үкімімен жүктелген міндеттерді орындамай, құқықбұзушылықтарға барған сотталғандарға қатысты заң аясында тиісті шараларды қабылдауда. Пробация бақылауында жүрген азаматтардың кейбірі қоғамдық жұмыстарды орындаудан жалтарып, әкімшілік құқықбұзушылықтар жасап, пробация қызметінің бірнеше ескертулеріне қарамастан өз міндеттерін орындаудан бас тартуда.
Қоғамдық жұмысты орындаудан жалтарып жүрген азаматтың бірі Қармақшы аудандық пробация есебінде тұрады. ҚР ҚК-нің 296- бабының 2- бөлігімен қылмыстық теріс қылық жасағаны үшін сот үкімімен 80 сағаттық қоғамдық жұмысқа тартылған болатын. Алайда, ол сот жүктеген міндеттерді орындаудан бас тартып, пробация қызметінің бірнеше рет жасаған ескертулеріне қарамастан заң талаптарын сақтамаған. Сонымен қатар, ол қоғамдық орында тәртіп бұзып, әкімшілік жауапкершілікке тартылған.
Пробация қызметі бұл жағдайды назардан тыс қалдырмай, заң аясында тиісті шаралар қабылдады. Қоғамдық жұмыстарды орындаудан үзілді-кесілді бас тартқан сотталғанның іс-құжаттары сотқа жолданып, сот шешімімен жазасы қамаққа ауыстыру мәселесі қарастырылуда.
Пробация инспекторы Жақсыбек Жүнісовтың айтуынша, сот үкімімен жүктелген міндеттерді орындамай, пробация қызметінің ескертулерін елемеген азаматтар жазасыз қалмайды. Пробация бақылауында жүрген сотталғандар өздеріне жүктелген міндеттерді орындауға міндетті. Егер олар жазаны өтеу тәртібін бұзып, құқықбұзушылық жасаса, олардың ісі сотқа жолданып, сотпен қосымша шаралар қабылданатын болады дейді әділет майоры.