Қазақстанда су тасқынынан зардап шеккен отбасылар үшін 1 828 үйдің құрылысы жүріп жатыр. Бұл туралы өнеркәсіп және құрылыс министрі Қанат Шарлапаев айтты, — деп хабарлайды Tengrinews.kz тілшісі.
Үкімет отырысында сөйлеген сөзінде Қанат Шарлапаев Қазақстанда су тасқыны салдарынан 18 005 жылжымайтын мүлік бүлінген деп танылғанын айтты. Олардың 17 295-і бойынша зертеу нәтижесі бар. 2 245 нысан салу, жылжымайтын мүлік нарығында 5 235 үй мен пәтер сатып алу, 9 819 тұрғын үйді жөндеу жоспарланған.
«Бүгінде республика бойынша 1 828 тұрғын үй құрылысы басталды, бұл 81 пайыз болады. Бұл ретте Батыс Қазақстан облысы мен Ақмола облысында қарқын мен жұмылдыру төмен болып отыр. Ақтөбе облысы мен Батыс Қазақстан облысында 2 122 үй әлі су астында. Техникалық сараптама қорытындысының жоқтығына қарамастан, меншік иелеріне тұрғын үй салу және сатып алу шаралары жүргізіліп жатыр», — деді Шарлапаев.
Министрдің айтуынша, жылжымайтын мүліктері жарамсыз деп танылған қазақстандықтар үшін 1943 жылжымайтын мүлік сатып алынған. Бүгінде 1 772 үйдің иелері төлемдерін алды.
