Уақыт белдеуінің өзгеруіне байланысты электр энергиясын тұтыну қалай өзгерді? Бұл туралы энергетика вице-министрі Сұңғат Есімханов айтты, — деп хабарлайды Tengrinews.kz тілшісі.
Сенат кулуарында журналистер вице-министрден кей өңірде сағат өзгергеннен кейін қараңғы тез түсетінін ескерсе, қазақстандықтар электр энергиясын көбірек тұтына бастады ма деген сұрақ қойды.
«Жүйелік оператор — KEGOC компаниясы бұл мәселені уақыт ауысқанға дейін қарастырған. Олардың мәліметі бойынша, электр энергиясын тұтынудың өзгеру диапазоны тұтынудың 1-2 пайызы болады, оның ішінде ең жоғары кезеңді қосқанда да. Менің ойымша, олар дәл сандарды ұсынады», — деп түсіндірді Есімханов.
Оның айтуынша, электр энергиясына деген сұраныстың артуына байланысты қазақстандықтар тарапынан ешқандай шағым немесе өтініш түспеген.
