ҚР Еңбек және халықты әлеуметтік қорғау министрлігінің Мемлекеттік еңбек инспекциясы комитетінің мәліметі бойынша 2024 жылы өндірістегі жазатайым оқиғалардан 1 408 жұмысшы зардап шегіп, оның 202-і қаза болған, — деп хабарлайды Massaget.kz тілшісі.
Ведомствоның мәліметінше, 2024 жылдың қорытындысы бойынша өндірістік жарақаттану 2023 жылмен салыстырғанда 4,5 пайыз төмендеді.
2024 жылдың қорытындысы бойынша өндірістік жарақаттану коэффициенті (1000 жұмыскерге шаққандағы жазатайым оқиғалардың жиілігі) 0,20 болды.
Республиканың өндірістік аймақтарында зардап шеккендер көп:
- Қарағанды облысында — 159 адам;
- ШҚО-да — 124 адам;
- Павлодар облысында — 112 адам;
- Абай облысында — 101 адам;
- Қостанай облысында — 91 адам;
Сондай-ақ Алматыда 116 адам зардап шекті.
Экономиканың салалары бойынша ең көп зардап шеккендер тау-кен металлургия кешенінің өнеркәсіптерінде — 18,3 пайыз және құрылыс саласында — 10,1 пайыз.
Жазатайым оқиғалар өндірістегі жұмыстың тиісті деңгейде ұйымдастырылмағанынан (35,5 пайыз) жәбірленушінің абайсыздығынан (31 пайыз) жол қозғалысы ережелерін (8,2 пайыз) және еңбек қауіпсіздігі және еңбекті қорғау ережелерін бұзғаннан (7,6 пайыз) болған.
