Президент Қасым-Жомарт Тоқаев Al Jazeera-ға берген сұхбатында қазақ мұнайын тасымалдаудың баламалы жолдарына қатысты пікір білдірді, — деп хабарлайды Massaget.kz тілшісі.
Al Jazeera журналисі сұхбат барысында S&P Global агенттігі қазақ мұнайының 80 пайызға жуығы Каспий құбыр консорциумы (КҚК) арқылы Ресейге жөнелтілетінін мәлімдегенін айтты.
«Мұны өзгерту керек деп ойлайсыз ба? Бұл Қазақстан үшін стратегиялық осалдық емес пе?» деп сұрады.
«Ресей Қазақстанның стратегиялық серіктесі, жақын көршіміз және одақтасымыз екенін ұмытпауымыз керек. Ресеймен арадағы шекара — әлемдегі ең ұзын шекара. Сонымен қатар, Ресейге стратегиялық серіктес ретінде сенеміз, әсіресе, КҚК-ға сенеміз. Жуырда президент Путинмен телефон арқылы сөйлестім, біз КҚК-ға қатысты мәселелерді талқыладық. КҚК алдағы уақытта да қазақ мұнайын Ресей арқылы еуропалық нарыққа және одан тыс жерлерге тасымалдау үшін жақсы құрал болатынына сенімдімін», — деп жауап берді Қасым-Жомарт Тоқаев.
Al Jazeera өкілі «Қазақстан КҚК арқылы Еуропаға мұнай жеткізуге Украинадағы соғыс әсер етеді деп алаңдай ма?» деген сұрақ қойды.
«Әрине, Украинада болып жатқан оқиғалардың, Ресей мен Украина арасындағы әскери қақтығыстың табиғи ресурстар мен оларды халықаралық нарыққа экспорттау саласындағы стратегиялық жоспарларымызға қалай әсер ететінін ескереміз. Сонымен қатар, Ресеймен стратегиялық серіктестігімізге сенеміз. Алайда бұл біз бір бағытқа ғана назар аударамыз дегенді білдірмейді. Сондықтан Баку-Джейхан құбыры, Орта дәліз және басқа маршруттар туралы айтқаныңыз дұрыс. Бірақ мұнайды шетелге тасымалдау немесе экспорттау көлемі туралы айтар болсақ, КҚК-ға басымдық берілуге тиіс», — деп түйіндеді Президент.
КҚК қазақстандық Теңіз мұнай кен орнын Қара теңіздегі (Новороссийск портына жақын) «Южная Озереевка» мұнай терминалымен байланыстырады. Құбырдың жалпы ұзындығы 1 510 шақырымға жетеді, оның 452 шақырымы — қазақстандық учаске. КҚК қуаты жылына 81,5 миллион тоннаға жетеді.
2024 жылдың қорытындысы бойынша қазақстандық мұнай экспортының көлемі 68,6 миллион тонна болды. КҚК мұнай құбыры арқылы 54,9 миллион тоннаға жетті, бұл — экспорттың жалпы көлемінің 80 пайызы.
