ІІМ өкілі 13 ақпаннан кейін полиция қызметкері жолда тоқтатып жүргізуші куәлігін талап етсе, өзіңмен болмаған жағдайда айыппұл жазамын деп қорқытса не істеу керегін айтты, — деп хабарлайды Tengrinews.kz тілшісі.
«Полиция қызметкері құжат талап етсе, 102 нөміріне немесе өзіндік қауіпсіздік бөліміне қоңырау шалсаңыз болады. Сот арқылы әкімшілік хаттама толтыруға қарсылығыңызды білдіре аласыз. Бұл жағдайда сіздің құқығыңыз шектелмейді», — деп жауап берді ІІМ Әкімшілік полиция комитеті төрағасының орынбасары Серік Түсіпов.
Оның айтуынша, әр қызметкерге жаңа заңның нормасы түсіндіріліп, нұсқаулық өткізілген. Сондықтан мұндай оқиғалар болмайды.
Бұған дейін Қазақстанда жүргізуші құжаттарының бірі жоқ болса ескерту немесе 5 АЕК (13 225 теңге) мөлшерінде айыппұл қарастырылған. 13 ақпаннан бастап айыппұл салынбайды.
