Білім және ғылым сапасын қамтамасыз ету комитетіне білім беру қызметкерлерінен түрлі жағдайда ақша жинауға қатысты аноним шағымдар тұрақты түрде түседі. Бұл туралы ведомство өкілдері мәлімдеді, — деп хабарлайды Tengrinews.kz тілшісі AstanaTV арнасына сілтеме жасап.
Шығыс Қазақстан облысында мұғалімдер арасында ақша жинауға қатысты жанжал шықты. Сонымен қатар, білім беру қызметкерлері мәселені сыртқа шығаруға ұмтылмайды. Зайсан қаласындағы балабақша меңгерушісі мемлекеттік аттестациядан өту үшін әріптестерінен ақша жинап алған. ҚР Білім және ғылым министрлігінің мәліметінше, маман жұмыстан босатылған.
«Бізге балабақша меңгерушісі мемлекеттік аттестациядан өтуге қаражат жинап жатқаны туралы 24 балабақша тәрбиешісінен өтініш түсті. Бұл мәселені құзырлы органдар қарап жатыр», — деді ШҚО білім беру қызметін лицензиялау басқармасының басшысы Сәуле Балтабаева.
Білім басқармасының басшысы бұған дейін балабақша меңгерушісіне екі рет сөгіс жарияланғанын түсіндірді.
Білім және ғылым сапасын қамтамасыз ету комитеті мәліметінше, бұған дейін Түркістан мен Алматы облысының мұғалімдері заңсыз ақша жинағаны хабарланған.
