Конституциялық реформа бойынша референдум өткізілгеннен кейін Парламент депутаттары өкілеттігінен мерзімінен бұрын айырылуы мүмкін. Бұл туралы жаңа Конституция жобасында айтылған, — деп хабарлайды Massaget.kz тілшісі.
Құжат жобасында референдумда жаңа Конституция қабылданса, ол 2026 жылғы 1 шілдеден бастап күшіне енетіні айтылған.
Қазіргі Парламент бұрынғы құраммен осы күнге дейін ғана жұмысын жалғастырады.
Референдум қашан өтеді?
Еске салайық, 2026 жылы 11 ақпанда Конституциялық комиссия Мемлекет басшысына жаңа Конституцияның қорытынды жобасын ұсынды.
Кейін Мемлекет басшысы 2026 жылғы 15 наурызда республикалық референдум өткiзу туралы жарлыққа қол қойды.
Референдум — азаматтардың ең маңызды мемлекеттік, өңірлік немесе жергілікті мәселелер бойынша тікелей ерік білдіру нысаны (жалпыхалықтық дауыс беру). Референдум арқылы заңдар қабылданады, Конституцияға өзгерістер енгізіледі немесе шешуші саяси мәселелер қаралады. Әдетте референдумда қабылданған шешімдердің күші міндетті болады.
