Орташа қауіпсіздік мекемесінде сотталғандарды әлеуметтік бейімдеу мәселелері бойынша кездесу өтті

Абай облысы бойынша Қылмыстық-атқару жүйесі департаментінің орташа қауіпсіздік мекемесінде сотталғандармен «Антарес-А» қоғамдық қорының заңгері және Семей қаласының «Мансап орталығы» КММ өкілдерінің қатысуымен кездесу өткізілді. Іс-шараға барлығы 43 сотталған қатысты.
Кездесудің негізгі мақсаты – сотталғандарға құқықтық және әлеуметтік қолдау көрсету, сондай-ақ оларды босатылғаннан кейінгі өмірге бейімдеу мен жұмысқа орналасуына жәрдемдесу.
Кездесу барысында «Антарес-А» қоғамдық қорының заңгері сотталғандарға құқықтық мәселелер бойынша түсіндірме беріп, заң көмегін алу және әлеуметтік қолдау шараларының мүмкіндіктері туралы ақпарат ұсынды.
Ал Семей қаласының «Мансап орталығы» КММ өкілдері жұмысқа орналасуға жәрдемдесу шаралары, кәсіптік оқыту мүмкіндіктері және босатылғаннан кейін жұмыс іздеу жолдары туралы мәлімет берді.
Сонымен қатар сотталғандарды босатылуға дайындау, әлеуметтік байланыстарын қалпына келтіру және олардың қоғамға сәтті бейімделуіне жағдай жасау мәселелеріне ерекше назар аударылды.
Мұндай іс-шаралар сотталғандардың құқықтық сауаттылығын арттыруға, болашағына жауапкершілікпен қарауын қалыптастыруға және қайталап құқық бұзушылық жасау қаупін төмендетуге ықпал етеді.
Сотталғандарды әлеуметтік бейімдеу және босатылуға дайындау бағытындағы жұмыстар қоғамдық ұйымдармен және уәкілетті мемлекеттік органдармен бірлесіп жалғасын табуда.