Нұр-Сұлтандағы «Қазақстан» спорт кешені апатты жағдайда. Бұл туралы қала әкімі Алтай Көлгінов есеп беру жиналысында айтты, — деп хабарлайды Tengrinews.kz тілшісі.
«Қазіргі уақытта ғимарат апатты жағдайда тұр. Сондықтан біз жобалық-сметалық құжаттама әзірлеп жатырмыз. Биыл күрделі жөндеу жұмыстарын бастаймыз. Ғимаратты толығымен бұзуға тура келуі де мүмкін», — деді Көлгінов халыққа есеп беру кездесуінде.
«Бірінші кезекте мамандар кешеннің қандай бөлігін алып тастап қайта жасау қажет екенін жоспарлап береді. Жобаға сәйкес жұмыс істейміз. Құрылыс биыл басталады. 2022 жылы кешенді тұрғындар қолданысына беруіміз қажет. Бұл ауданда «Қазақстан» СК тұрғындарға, әсіресе жастарға спортпен шұғылдануға және денсаулығын нығайтуға мүмкіндік береді», — деп уәде берді қала басшысы.
Айта кетейік, бұған дейін «Қазақстан» спорт кешені «Барыс» хоккей клубының аренасы болған.
Ғимарат 2001 жылғы наурызда ашылды. 2007 жылы кешенді «Барыс» ҚХЛ-ға қатысуы үшін қайта жөндеуден өткізді.
