Тіл — халықтың жаны, рухани байлығы мен мәңгілігінің кепілі. Әр ұлттың өзіндік болмысы, мәдениеті мен тарихы ең алдымен оның тілінде сақталады. Сондықтан да мемлекеттік тіл мәселесі — кез келген ел үшін стратегиялық маңызы бар ұлттық мәселе. Қазақ елі үшін де бұл тақырып тәуелсіздікпен тікелей байланысты, өйткені мемлекеттік тіл — тәуелсіздігіміздің басты тірегі, елдігіміздің айғағы.
Тәуелсіздік — бұл тек саяси еркіндік емес, ол ең алдымен рухани тәуелсіздік. Ал рухани тәуелсіздіктің өзегі — тіл. Егер ел өз тілін құрметтеп, оны қоғамның барлық саласында қолдана білсе, сол елдің рухы биік, болашағы жарқын болады. Қазақ тілі — ғасырлар бойы халқымыздың рухани байлығын, салт-дәстүрін, дүниетанымын сақтап келген қасиетті қазына.
1990 жылы Қазақстан егемендігін жариялаған соң, мемлекеттік тіл мәртебесіне ие болған қазақ тілі жаңа кезеңге қадам басты. Бұл — ұлт тарихындағы ұлы бетбұрыс еді.
Қазақстан Республикасының Конституциясында: «Қазақстан Республикасының мемлекеттік тілі — қазақ тілі» деп нақты жазылған. Бұл бап қазақ тілінің ел өміріндегі заңды орнын бекітіп қана қоймай, оның болашағына жол ашты. Мемлекеттік тіл — тек ресми құжаттар мен заңдар тілі емес, ол — ел бірлігінің, ұлттың тұтастығының символы.
Бүгінде қазақ тілін дамыту мақсатында көптеген мемлекеттік бағдарламалар қабылданды. Мектептерде, жоғары оқу орындарында, мемлекеттік мекемелер мен бұқаралық ақпарат құралдарында қазақ тілінің қолданыс аясын кеңейту жұмыстары жүргізілуде. Дегенмен, тілдің дамуы — тек заң мен бағдарламаның емес, әр азаматтың саналы көзқарасына байланысты іс. Ана тілі — ұлттың рухани тірегі. Ана тілін құрметтеу — өз ұлтыңды, өз тамырыңды құрметтеу. Ұлы жазушы Ғабит Мүсірепов айтқандай: «Тілі жоғалған ұлттың өзі де жоғалады». Бұл сөздің астарында үлкен шындық жатыр. Егер біз қазақ тілін күнделікті өмірімізде кеңінен қолданбасақ, онда тәуелсіздігіміздің рухани іргетасы әлсірейді.
Сондықтан әр қазақ баласы өз тілін білуге, сөйлеуге, дамытуға міндетті. Бұл — ел алдындағы борыш, ұлт алдындағы жауапкершілік.
Арнұр Сағымбеков, Жамбыл облысының қылмыстық істер жөніндегі мамандандырылған ауданаралық соты әкімшісінің бас маманы
