Қазақстан Республикасының мемлекеттік тілі – қазақ тілі. Мемлекеттік тіл – тәуелсіздіктің, ұлттық бірліктің және ел болашағының басты тіректерінің бірі. Тіл – тек қарым-қатынас құралы ғана емес, халықтың тарихын, мәдениетін, рухани құндылықтарын сақтайтын асыл мұра.
Бүгінде мемлекеттік тілді дамыту мен оның қолдану аясын кеңейту – мемлекет саясатының басым бағыттарының бірі. Қазақстан Республикасының Конституциясында қазақ тіліне мемлекеттік тіл мәртебесі беріліп, оның қоғамның барлық саласында қолданылуына ерекше мән берілген. Осыған байланысты мемлекеттік органдарда, соның ішінде сот жүйесінде де мемлекеттік тілдің қолданыс аясын арттыру маңызды міндет болып табылады.
Сот саласында мемлекеттік тілді дамыту – азаматтардың құқықтарын қорғау мен әділ сот төрелігін қамтамасыз етудің маңызды кепілі. Азаматтардың сотқа жүгінуі, өтініштер мен талап-арыздардың мемлекеттік тілде қабылдануы және қаралуы – заң талаптарының орындалуының айқын көрінісі. Мемлекеттік тілде іс жүргізу сот жүйесінің ашықтығы мен қолжетімділігін арттырады.
Қазіргі таңда соттарда мемлекеттік тілде құжат айналымын жүргізу, сот актілерін әзірлеу және азаматтарға қызмет көрсету бағытында жүйелі жұмыстар атқарылып келеді. Бұл өз кезегінде мемлекеттік тілдің беделін көтеріп, қоғамдағы рөлін нығайтуға ықпал етеді.
Тілге құрмет – елге құрмет. Әрбір азамат мемлекеттік тілді білуге, оны күнделікті өмірде кеңінен қолдануға және келер ұрпаққа насихаттауға міндетті. Мемлекеттік тілдің мәртебесін көтеру – баршамызға ортақ жауапкершілік.
Қорытындылай келе, мемлекеттік тіл – ұлттың рухани тірегі, елдігіміздің айғағы. Қазақ тілінің қолданыс аясын кеңейту және оның қоғамдағы маңызын арттыру – әрбір қазақстандықтың азаматтық парызы.
Хусаинова Әйгерім Акпарқызы,
Шымкент каласы мамандандырылган ауданаралық экономикалық сотының Бас маманы
