Тіл – халықтың ең қымбат қазынасы, ұлттың рухани байлығы мен мәдениетінің айнасы. Әр халықтың тарихы, салт-дәстүрі, дүниетанымы мен болмысы оның тілі арқылы сақталып, келер ұрпаққа жетеді. Сондықтан тіл – тек қарым-қатынас құралы ғана емес, елдің бірлігі мен тәуелсіздігінің маңызды негізі.
Қазақстан Республикасында қазақ тіліне мемлекеттік тіл мәртебесі берілген. Бұл – тәуелсіз еліміздің басты жетістіктерінің бірі. Мемлекеттік тілдің мәртебесін көтеру, оның қолданылу аясын кеңейту – баршамызға ортақ міндет. Себебі мемлекеттік тілді құрметтеу – Отанды, елді және ұлттық құндылықтарды құрметтеу деген сөз.
Қазіргі уақытта мемлекеттік тіл қоғам өмірінің барлық саласында кеңінен қолданылып келеді. Әсіресе мемлекеттік органдарда, білім беру мекемелерінде, бұқаралық ақпарат құралдарында және сот жүйесінде қазақ тілінің рөлі артып отыр. Бұл еліміздің рухани дамуы мен ұлттық сананың нығаюына оң әсерін тигізуде.
Тіл мәдениеті де қоғам үшін аса маңызды мәселе. Әрбір азамат өз ана тілінде сауатты сөйлеп, ойын анық әрі түсінікті жеткізе білуі қажет. Тілді шұбарламай, әдеби нормаға сай қолдану – мәдениеттіліктің белгісі. Әсіресе мемлекеттік қызметкерлер мен жастардың тілге деген жауапкершілігі жоғары болуы тиіс. Себебі тілдің болашағы – оны қолданатын ұрпақтың қолында.
Ахмет Байтұрсынұлы «Тілі жоғалған жұрттың өзі де жоғалады» деп бекер айтпаған. Шынында да, тілін жоғалтқан халық өзінің ұлттық болмысынан айырылып қалуы мүмкін. Сондықтан мемлекеттік тілді дамыту, оны күнделікті өмірде кеңінен қолдану және жас ұрпаққа үйрету – маңызды міндеттердің бірі.
Қазіргі кезеңде цифрлық технологиялардың дамуы мемлекеттік тілдің қолданылуына жаңа мүмкіндіктер беруде. Қазақ тіліндегі электронды ресурстардың, ақпараттық жүйелердің және бұқаралық контенттің көбеюі тілдің дамуына оң ықпал етуде. Бұл мемлекеттік тілдің заман талабына сай дамып келе жатқанын көрсетеді.
Сонымен қатар мемлекеттік тілді дамыту тек заң талаптарымен шектелмеуі тиіс. Тілге деген құрмет әр адамның ішкі мәдениетінен, азаматтық ұстанымынан басталады. Ана тілін білу және құрметтеу – әр азаматтың парызы.
Тіл – ұлттың жаны, халықтың рухани тірегі. Мемлекеттік тілді дамыту мен оның мәртебесін көтеру – тәуелсіз еліміздің болашағы үшін маңызды міндет. Тілді құрметтеу арқылы біз ұлттық құндылықтарымызды сақтап, келер ұрпаққа аманаттаймыз. Сондықтан мемлекеттік тілді дамыту – баршамыздың ортақ жауапкершілігіміз.
Ақтөбе қаласының әкімшілік құқық бұзушылықтар жөніндегі мамандандырылған ауданаралық сотының бас маман – сот отырысының хатшысы Д.Сагиндикова
