Мемлекеттік тіл – бұл елдің тәуелсіздігінің, ұлттық бірегейлігінің және рухани дамуының басты тірегі. Қазақстан Республикасының Конституциясына сәйкес, қазақ тілі мемлекеттік тіл мәртебесіне ие, бұл әрбір азамат үшін оны білу әрі құрметтеу борыш екенін білдіреді. Бүгінгі таңда мемлекеттік тілдің қолданыс аясын кеңейту мақсатында білім беру, мемлекеттік басқару, сот және құжат айналымы салаларында түрлі шаралар жүзеге асырылуда. Соңғы жылдары мемлекеттік тілдің мәртебесін арттыруда елеулі жетістіктер бар: мектептер мен жоғары оқу орындарында қазақ тілінде білім алу мүмкіндігі кеңейіп, мемлекеттік қызметке қабылдануда қазақ тілін меңгеру талабы күшейтілді. Сонымен қатар, БАҚ-та, интернетте және әлеуметтік желілерде қазақ тіліндегі контенттің артуы мемлекеттік тілдің өміршеңдігін арттыруда маңызды рөл атқаруда. Дегенмен, қиындықтар да жоқ емес. Кейбір өңірлерде орыс тілінің басымдығы әлі сезіледі, қазақ тілін меңгеру деңгейі аймақтар бойынша біркелкі емес, ал терминология мен оқу-әдістемелік базаны жетілдіруді қажет етеді. Осы мәселелерді шешу үшін мемлекет бірнеше стратегиялық қадам жасауда. 2023–2029 жылдарға арналған тіл саясаты концепциясында қазақ тілінің ғылым, білім, медиа және технология саласында толыққанды қолданылуын қамтамасыз ету, мемлекеттік қызметкерлердің тілдік құзыретін арттыру, сондай-ақ «Қазтест» жүйесі арқылы тіл меңгеру деңгейін бағалау міндеті қойылған. Болашақта мемлекеттік тілдің қолданылу аясын одан әрі кеңейту үшін қазақ тіліндегі заманауи контент пен цифрлық ресурстарды дамыту, жастар арасында тілдік мәдениетті нығайту және қоғамда тілге деген құрмет сезімін қалыптастыру маңызды. Мемлекеттік тіл – тек қарым-қатынас құралы ғана емес, сонымен бірге ұлтты біріктіретін рухани өзек. Оның болашағы әрбір азаматтың саналы таңдауы мен қоғамның ортақ ұмтылысына байланысты. Егер біз мемлекеттік тілді ғылым, мәдениет, бизнес пен технология тіліне айналдыра алсақ, онда қазақ тілі әлемдік өркениет көшінде өз орнын табатыны сөзсіз.
Түркістан облысының кәмелетке толмағандардың істері жөніндегі мамандандырылған ауданаралық сотының бас маман сот отырысының хатшысы Д. Ходжаева
