Қазіргі таңда мемлекеттік қызмет саласына қойылатын талаптар күн сайын артып келеді. Себебі мемлекеттік қызметші – мемлекет пен халық арасындағы негізгі байланысты қамтамасыз ететін тұлға. Халық мемлекеттік органның деңгейін ең алдымен сол жерде қызмет атқаратын қызметкердің мәдениеті мен қарым-қатынасына қарап бағалайды. Сондықтан мемлекеттік қызметшінің әдептілігі мен кәсіби мәдениеті қоғам үшін ерекше маңызға ие.
Әдептілік – адам бойындағы ең асыл қасиеттердің бірі. Ол сыпайылықтан, жауапкершіліктен, әділдіктен және адамға құрметпен қараудан көрінеді. Мемлекеттік қызметші өз қызметін атқару барысында азаматтармен күнделікті қарым-қатынас жасайтындықтан, оның әрбір сөзі мен әрекеті мемлекеттік органның беделіне әсер етеді. Сол себепті мемлекеттік қызметкер тек кәсіби білікті маман ғана емес, жоғары мәдениетті, сабырлы әрі әдепті тұлға болуы тиіс.
Мемлекеттік қызметшінің әдебі ең алдымен азаматтармен қарым-қатынас кезінде байқалады. Қызметкер қандай жағдайда болмасын сабыр сақтап, адамдарға құрметпен қарап, олардың мәселесіне түсіністікпен қарауы қажет. Дөрекілік, немқұрайлылық немесе қызметтік өкілеттікті асыра пайдалану халықтың мемлекетке деген сенімін төмендетеді. Ал сыпайы сөйлеп, заң аясында нақты әрі түсінікті жауап беру – мемлекеттік қызмет мәдениетінің белгісі.
Қазіргі уақытта мемлекеттік қызметшілердің Әдеп кодексі қабылданып, қызметтік этика мәселесіне ерекше көңіл бөлінуде. Бұл құжат мемлекеттік қызметкерлердің мінез-құлқына қойылатын талаптарды айқындайды. Әдеп кодексінің негізгі мақсаты – мемлекеттік аппараттың беделін арттыру, қоғам тарапынан сенімді күшейту және қызметкерлер арасында жоғары моральдық құндылықтарды қалыптастыру.
Мемлекеттік қызметшінің әдептілігі тек сөйлесу мәдениетімен шектелмейді. Оның сыртқы келбеті, уақытты тиімді пайдалануы, әріптестермен қарым-қатынасы, жауапкершілігі мен тәртібі де маңызды рөл атқарады. Әдепті қызметкер өз міндетіне адал қарап, халыққа сапалы қызмет көрсетуге ұмтылады. Сонымен қатар ол сыбайлас жемқорлыққа қарсы қағидаттарды сақтап, әділдік пен ашықтықты басты орынға қояды.
Бүгінде қоғам мемлекеттік қызметкерлерден ашықтықты, әділдікті және жоғары мәдениетті талап етеді. Сондықтан әрбір мемлекеттік қызметші өзінің кәсіби білімін жетілдірумен қатар, адамгершілік қасиеттерін де дамытуы қажет. Себебі мемлекеттік қызмет – үлкен жауапкершілік пен сенім жүктелген сала.
Мемлекеттік қызметшінің әдептілігі – қоғам сенімінің, мемлекеттік қызмет сапасының және ел беделінің маңызды көрсеткіші. Әдепті, мәдениетті және жауапты қызметкер ғана халықтың құрметіне ие болып, мемлекеттің дамуына үлес қоса алады. Сондықтан мемлекеттік қызмет саласында әдеп нормаларын сақтау – әрбір қызметкердің басты міндеті.
А.Бажикбаева, Ақтөбе қаласының әкімшілік құқық бұзушылықтар жөніндегі мамандандырылған ауданаралық сотының бас маман—сот отырысының хатшысы
