«Жүз жыл өмір сүрсең, жүз жыл оқы» деген даналық қағида бар. Бұл бүгінгі ақпарат тасқынында, дүние қас-қағым сәтте сан өзгеріске түсіп,технология секундтар ішінде жетіліп үлгеріп жатқан дәуірде өте қажет. Расы керек, осынау үрдісте алымдылық танытып,жылдам ілесуде қашан да біз үлкендер кенжелеп қаламыз.»Ақыл жастан» деп мұндайда алғыр да зерек,саналы кейінгі буынның көмегіне ділгірміз.
Жалпы журналистика өмірбақи ізденісті қажет етеді.Ақпарат алудан бастап,оның дәлдігіне,ақиқаттығына көз жеткізу бүгінде оңай әрі қиын. Оңайлығы олардың көздері көп болса,қиындығы сол көздердің артында әр түрлі пиғылдағы күштердің тұрғаны. Арандап қалып,от басуың демде. Бұл орайда өзің ғана емес, сөзіңді оқып,тыңдап отырған қалың бұқараны шатастырасың. Сондықтан журналист сөзінің шындыққа құрылуы өте маңызды.
Бұл әрине, білім,білік,тәжірибенің сыртында ақпарат айдынындағы жаңа бағыттарды,тың тәсілдерді игеруді қажет етеді.Белгілі журналист Нәзия Жоямергенқызы жетекшілік ететін Түркі тілдес журналистер қоры осы тұрғыда журналистерге қажет көптеген игі істерді қарқынды жүргізуде.
Өткен бейсенбі- жұма күндері қор тағы да журналистерді Астана қаласында жинап, «Әлеуметтік журналистика: БАҚ-тағы әлеуметтік мәселелер» деген тақырыпта семинар-тренинг өткізді. Қор төрағасы Назия Жоямергеннің өзі модераторлық еткен бұл шарада журналистер қазіргі таңдағы журналистика үшін өзекті мәселелер бойынша дәріс тыңдады,шеберлік сабақтарынан өтті.Атап айтқанда «Пропаганда және ақпараттық манипулация»,»Фактчекиң және журналистік зерттеу»,»Ақпаратты талдау: манипулация,пропаганда мен кликбейтті анықтау» сынды маңызды тақырыптар бойынша кең ауқымда мағлұмат берілді,нақты әдіс-тәсілдер игертілді. Медиатренерлер британдық маман Ватан Өз бен белгілі журналист Халима Тәжіқұл болды. Ұйымдастырушыларға мың алғыс.
Әсіресе, бір өзі отандық журналистердің білім-білігін жетілдіруде,бірлігін нығайтуда, жастарды тәрбиелеп,ардагерлерді ұлықтауда министрліктің жұмысына тең жұмыс атқарып жүрген Түркітілдес журналистер қорының төрағасы Назия Жоямерген сіңілімізге зор тағзым. Еңбегі жана берсін!
