Батыс Қазақстан облысы Сырым ауданы Аралтөбе ауылының маңында, Жымпиты — Ақсай тасжолында салынған уақытша көпірді тасқын су шайып кетті, — деп хабарлайды Massaget.kz тілшісі «Уральская неделя» басылымына сілтеме жасап.
Бұл уақытша көпір былтыр негізгі көпірді жөндеуге байланысты салынған еді. Оны 15 наурызда Шідерті өзені көтерілген кезде су шайып кетті. Аралтөбе және Талдыбұлақ ауылы тұрғындарының ауданмен байланысы үзіліп қалды.
Қаратөбе ауданының Ақтайсай ауылы да аудан орталығынан ажырап қалды. 15 наурыздан бастап еріген су жол арқылы өтіп жатыр.
Басылым мәліметінше, аудан орталығына апаратын осы қара жол жыл сайын су тасқыны кезінде шайылып кетеді, ал ауыл тұрғындары бір апта бойы су деңгейі түсіп, жол кепкенін күтуге мәжбүр.
Еске салайық, бұған дейін су тасқыны қаупі жоғары аймақтар аталды. Қауіп орташа өңірлер қатарында БҚО бар.
Фото: «Уральская неделя»
