Бүгінгі жаһандану дәуірінде білім беру жүйесінің сапасы мемлекеттің болашағын анықтайтын басты факторлардың бірі болып табылады. Әл-Фараби атындағы Қазақ ұлттық университеті – еліміздегі жетекші жоғары оқу орындарының бірі ретінде сапалы білім беруді басты мақсат етіп қойып отыр. БҰҰ-ның бастауымен алғаш рет «тұрақты даму» концепциясы ұсынылды. «Тұрақты даму мақсаттары» – қазіргі уақыттың қажеттілігін қамтамасыз ете отырып, болашақ ұрпақтардың өзінің қажеттіліктерін қамтамасыз етуіне қауіп туғызбайтын даму.Тұрақты даму мақсаттары концепциясының 4 бөлімі –«сапалы білім» екенін ескере отырып,оқу ордамыз білім беру бағдарламаларын әлемдік стандарттарға сәйкестендіріп, шетелдік университеттермен серіктестік орнатып келеді. QS World University Rankings секілді беделді рейтингтерде жоғары көрсеткішке ие болуы – университеттің білім беру сапасының дәлелі.Сапалы білім беру үшін университет цифрлық технологияларды белсенді түрде енгізуде. Электронды кітапханалар, онлайн курстар, қашықтықтан оқыту платформалары студенттердің білімін кеңейтіп, жаңа дағдыларды меңгеруге мүмкіндік береді.ҚазҰУ-дың білім алушылары мен оқытушылары ғылыми-зерттеу жұмыстарымен белсенді айналысып, халықаралық деңгейдегі жобаларға қатысады. Университет қабырғасында стартаптар мен инновациялық жобаларды қолдайтын орталықтар жұмыс істейді.Білім беру процесінде студенттердің сыни ойлау қабілетін дамытуға басымдық беріліп, жобалық оқыту, интерактивті лекциялар секілді әдістер қолданылады. Сонымен қатар, академиялық еркіндік қағидаты сақталған.Теориялық біліммен қатар, студенттердің практикалық дағдыларды меңгеруі маңызды. Осы мақсатта оқу ордасы әртүрлі кәсіпорындармен, мемлекеттік және халықаралық ұйымдармен ынтымақтастық орнатып, студенттердің тәжірибе алмасуына жағдай жасайды.
Қазіргі уақытта білім саласы бәсекеге қабілеттіліктің өлшеміне айналып отыр. Әлемдегі көшбасшы елдер ең алдымен білім мен ғылымды дамытуға күш салып, зор жетістіктерге жетуде. Осы орайда университеттің өркендеуіне заң факультеті қылмыстық құқық, қылмыстық іс жүргізу және криминалистика кафедрасы өз үлесін қосуда. Кафедрамыз сапалы білім беріп,сапалы мамандар дайындауды басты назарға алды.Сапалы білім тек теорияны үйретіп қана қоймай, оны нақты өмірде қолдануға бағытталған практикалық дағдыларды да қалыптастырады.Кафедрамыздың профессорлық-оқытушылар құрамы студенттерге білімді тәжірибеде қалай қолдануға болатынын көрсетіп,мықты маман болуға күш салуда.
ҚазҰУ – еліміздің зияткерлік элитасын даярлайтын жетекші білім ордасы. Университет сапалы білім беруді қамтамасыз етіп, студенттерге әлемдік деңгейде бәсекеге қабілетті маман болуға мүмкіндік береді. Біз келешек ұрпақтың білімді, білікті әрі озық технологияларды меңгерген тұлға болып қалыптасуы үшін бар күшімізді салуға дайынбыз.
Мухамадиева Г.Н.
Әл-Фараби атындағы ҚазҰУ Заң факультеті қылмыстық құқық, қылмыстық
іс жүргізу және криминалистика кафедрасының доценті,з.ғ.к
Ербол Ерім
Әл-Фараби атындағы ҚазҰУ Заң факультетінің студенті
