Ірі көлемде алаяқтық жасады деген күдікке ілінген әйел Түркиядан қайтарылды, — деп хабарлайды Massaget.kz тілшісі.
Бас прокуратура мен Интерпол Ұлттық орталық бюросы ҚР Сыртқы істер министрлігінің көмегімен бірнеше рет алаяқтық жасағаны үшін іздеуде жүрген Қазақстан Республикасының азаматын Түркия Республикасынан елге қайтарды.
Күдікті 2024 жылы Қызылорда қаласында жәбірленушілерге зергерлік бұйымдарды төмен бағамен сатып алып беремін деп уәде етіп, алдау арқылы олардың ақшасын иемденген.
Оның қылмыстық әрекеті салдарынан 8 адам жапа шегіп, оларға жалпы сомасы шамамен 130 млн теңге көлемінде материалдық залал келген. Қылмыстарды жасағаннан кейін күдікті ел аумағынан бой тасалап, оған халықаралық іздеу жарияланған.
«Жүргізілген іздестіру іс-шаралары барысында ол Түркия Республикасы аумағында ұсталды. Қазір күдікті тергеу изоляторына қамалды», — деп жазылған хабарламада.
