Ең төменгі қауіпсіздік мекемелерінде жазасын өтеп жатқан сотталғандар үшін бостандыққа шығатын күн ерекше мәнге ие. Әсіресе ұзақ мерзімге сотталған азаматтар үшін бұл күн – тек жазаның аяқталуы ғана емес, жаңа өмірдің басталуы.
Мұндай мекемелерде сотталғандарды қоғамға біртіндеп бейімдеуге барлық жағдай жасалады. Олар еңбекке тартылады, түрлі мамандықтарды меңгереді, тәрбиелік іс-шараларға қатысады. Бұл олардың еңбек дағдыларын сақтап, жауапкершілікті сезінуіне және бостандықтағы өмірге дайындалуына көмектеседі.
Түзелу жолында туыстар мен жақындардың қолдауы ерекше рөл атқарады. Отбасымен кездесулер сотталғандарға мекеме сыртында өздерін күтіп отырған жандар бар екенін еске салып, дұрыс жолға түсуге күш береді.
Ұзақ мерзімнен кейін бостандыққа шығатын күн әрқашан ерекше толқумен өтеді. Мекеме қақпасының сыртында жақындары күтіп тұрған сәт – әрбір адам үшін ұмытылмас сәттердің бірі.
Жақында ұзақ мерзімнен кейін бостандыққа шыққан сотталған Р. өз әсерімен бөлісті:
«Адам ұзақ уақыт бойы бас бостандығынан айырылған кезде өмірдің қадірін терең түсінеді. Бүгін осы қақпадан шығып, жаңа өмір бастауға мүмкіндік алғаныма қуаныштымын. Еркіндікті ештеңемен алмастыруға болмайды. Ендігі мақсатым – өткен қателіктерді қайталамай, адал өмір сүру».
Жасақ бастығы Ахмеджанова С.А. айтуынша, мекеме қызметкерлерінің басты міндеті – тәртіпті қамтамасыз ету ғана емес, сотталғандарды қоғамға қайта бейімдеуге көмектесу.
«Біздің мақсатымыз – әр адамға өз қателігін түсініп, бостандыққа шыққаннан кейін дұрыс жолмен өмір сүруге мүмкіндік беру. Егер бұрынғы сотталған азамат қоғамға қайта оралып, адал еңбек етіп, заңды құрметтеп өмір сүрсе, біздің еңбегіміздің нәтижесі сол», – деді ол.
Бостандыққа шығу – жаңа өмірге бастайтын алғашқы қадам. Ал сол қадам адамға болашаққа деген үміт пен жақсы өзгерістерге сенім береді.
