2026 жылы Қазақстанда зейнетақы мен жәрдемақыға 6,8 триллион теңге бөлу жоспарланған. Бұл туралы Еңбек және халықты әлеуметтік қорғау министрлігі мәлімдеді, — деп хабарлайды Massaget.kz тілшісі.
«2026 жылға арналған республикалық бюджет жобасы аясында зейнетақы мен жәрдемақы бойынша әлеуметтік төлемдерге жалпы сомасы 6,8 триллион теңге көлемінде шығын қарастырылған», — деп жазылған министрлік жауабында.
Ведомство мәліметінше, 2025 жылмен салыстырғанда төлемдерге арналған шығын 14,4 пайызға немесе 860,5 миллиард теңгеге өседі:
- зейнетақы мен жәрдемақы мөлшерін көтеруге 622,6 миллиард теңге;
- әлеуметтік төлем алушылар саны артуына байланысты 237,9 миллиард теңге бағытталады.
«2026 жылғы 1 қаңтардан бастап 2,6 миллионнан аса зейнеткер мен шамамен 2,3 миллион жәрдемақы алушы үшін зейнетақы мен жәрдемақы мөлшерін 10,5 пайызға көтеру жоспарланған», – деп жазылған хабарламада.
