Қазақстанда ипотекалық несиелер бойынша жылдық шекті мөлшерлеме қайта қаралды. Енді ол жылына 20 пайыздан аспауы тиіс. Бұған дейін бұл шек 25 пайыз болған еді, — деп хабарлайды Massaget.kz тілшісі.
Тиісті шешімді Қаржы нарығын реттеу және дамыту агенттігі мен Ұлттық банк бірлесіп қабылдады.
Мөлшерлемені төмендету туралы норма екі мекеменің 2025 жылдың сәуір және мамыр айларында қол қойған бірлескен қаулысында бекітілген. Бұл құжат 2024 жылдың тамызынан бастап қолданыста болған бұрынғы қаулыға өзгерістер енгізеді.
Жылдық тиімді сыйақы мөлшерлемесі (ЖТСМ) – бұл несиенің барлық комиссиялар мен төлемдерді қоса есептегендегі нақты құны. Шекті мөлшерлеменің белгіленуі банктердің осы көрсеткіштен жоғары ипотека беруіне тыйым салынатынын білдіреді.
Маңызды: бұл шектеулер тек жаңа шарттар жасалғанда ғана емес, бұрын берілген несиелер бойынша мөлшерлемелер өзгертілсе немесе жаңа комиссиялар енгізілсе, сол жағдайларға да қолданылады.
Құжат Әділет министрлігінде тіркелгеннен кейін «Әділет» құқықтық ақпарат жүйесінде жарияланады. Қазірдің өзінде онымен Қаржы нарығын реттеу және дамыту агенттігінің сайтынан танысуға болады.
Бұған дейін Ұлттық банк ипотеканы 11–12 пайызбен 10, 15, 20 жылға алу да көп қазақстандық үшін үлкен қаржылық ауыртпалық екенін мәлімдеген болатын.
