Қазір мұндай баспаналардың шаршы метрінің орташа бағасы 567 мың теңгеге жеткен. Ал Алматыда тіпті 700 мың теңгеден асып кеткен, — деп хабарлайды Massaget.kz тілшісі Информбюро 31-ге сілтеме жасап.
Ұлттық статистика бюросының дерегінше, Астана мен Шымкентте де баға өскен. Ескі пәтердің 1 шаршы метрі бірінде 678 мың, екіншісінде 457 мың теңгеге бағаланады.
Кейінгі айда республика бойынша жаңа үйдің орташа бағасы шарты метріне 550 мың теңгеге жуықтап қалды. Былтырмен салыстырсақ, 11 пайыз жоғары. Жаңаның аты жаңа, бірақ қазір екінші нарықтағы баспаналардың құны да тоқтаусыз өсіп жатыр. Әсіресе Алматыда қатты қымбат.
«700 мың дегенде ол баға сіз алғаннан кейін өседі. Бағадан қорқудың қажеті жоқ. Алматыда бірінші нарықтағы премиум үйлердің шаршы метрі 2-2 жарым миллион. Ескі болғанмен олардың орналасқан жері бірінші орында тұр», — дейді жылжымайтын мүлік сарапшысы Қайрат Қожанов.
Сарапшының айтуынша, Алматыда қазір жаңа үйлерге деген сұраныс жоғары. Оған ипотекалық бағдарламалар түрткі болған. Ал ол бағдарламалар бірінші нарықты ғана қолдайды, сол себепті ескі үйлердің құнының өсуі баспаналы болу көрсеткішіне әсер ете қоймайды.
Дегенмен халық ескі баспананың бағасын негізсіз көтеріліп жатыр деп санайды. Қазір пәтер жалдау ақысы да арзан емес. Қазақстан бойынша орташа құны шаршы метрі үшін 5 мың теңгедей болады. Бірақ жалдауға келгенде Шымкенттегі баға өсімі Атырау мен Алматыдан озып тұр.
