Қазақстанда шамамен 113 мың талапкер білім беру грантын алу конкурсына қатысу үшін өтініш берді, — деп хабарлайды Massaget.kz тілшісі Ғылым және жоғары білім министрлігіне сілтеме жасап.
Министрлік мәліметінше, бұл өткен жылмен салыстырғанда көп. 2023 жылы 104 мың өтініш түскен болатын.
«Гранттарды тағайындау туралы шешімді құрамына ҚР Парламенті депутаттары, мемлекеттік органдар мен қоғамдық ұйымдардың өкілдері кіретін республикалық конкурстық комиссия қабылдайды. Грант иегерлерінің тізімі 10 тамызға дейін жарияланады», – делінген хабарламада.
Қандай бағыттар көп таңдалған?
Министрлік бірнеше жылдан бері ең көп сұранысқа ие мамандықтарға талапкерлердің таңдауында аса өзгеріс жоқ екенін атап өтті. Биыл ең көп өтініш келіп түскен бағыттар:
Педагогикалық ғылымдар,
Инженерлік, өңдеу және құрылыс салалары,
Ақпараттық-коммуникациялық технологиялар.
Ал бір грантқа ең көп бәсеке болашақ аудармашылар, мұғалімдер, психологтар, дизайнерлер мен заңгерлер арасында күтіліп отыр.
Биыл қанша грант бөлінді?
Министрліктің дерегінше, биыл бакалавриатқа 77 мыңнан астам грант бөлінген.
«Ең көп грант инженерлік және техникалық бағыттарға бөлінді. Сонымен қатар «Педагогикалық ғылымдар» және «Әлеуметтік ғылымдар, журналистика және ақпарат» бағыттарына әрқайсысына 150 сараланған гранттан қарастырылды. «Серпін» бағдарламасы аясында 2 412 грант, ал Атырау және Маңғыстау облыстарының талапкерлеріне арналған 2 500 мақсатты білім гранты бөлінді», – делінген министрлік хабарламасында.
Еске салайық, қазақстандық жоғары оқу орындарының ақылы бөліміне құжат қабылдау 25 тамызға дейін жалғасады.