Атом энергиясы жөніндегі агенттік АЭС-тің қауіпсіздігі үшін жауапты болатын мемлекеттік органдарды атады, — деп хабарлайды Massaget.kz тілшісі.
Ядролық және радиациялық қауіпсіздікті қадағалайтын негізгі орган — Атом энергиясы агенттігінің атомдық қадағалау және бақылау комитеті. Ол барлық қауіпсіздік талабы сақталуын бақылауға, тексеруге, лицензиялауға жауапты.
Экология және табиғи ресурстар министрлігі қалдықтар өңделуін, қоршаған ортаға радиациялық әсерді — жалпы экологиялық нормативтер сақталуын бақылайды.
«Басқа мемлекеттік органдар өз құзыреті шеңберінде өнеркәсіп қауіпсіздігі, су ресурстарын қорғау, санитариялық қадағалау, төтенше жағдайлар және басқа да бағыттағы мәселелерде жұмылдырылады. Ядролық қауіпсіздіктің халықаралық стандарттары сақталуына АЭХА тарапынан бақылау жүргізіледі», — деді ведомство өкілі.
Қазақстандағы АЭС құрылысы
2025 жылы ақпанда Қазақстанда АЭС салынатын орын ресми түрде бекітілді. Премьер-министр Олжас Бектенов қол қойған қаулыға сәйкес Алматы облысы Жамбыл ауданы Үлкен ауылы алғашқы АЭС салынатын орын болып белгіленді.
Жуырда ресейлік «Росатом» компаниясы Қазақстандағы алғашқы АЭС-тің құрылысын жүргізетін халықаралық консорциумның көшбасшысы болып таңдалды.
