Қоғамда туындайтын кез келген дау мен келіспеушілік адамдар арасындағы қарым-қатынастың күрделілігін көрсетеді. Ондай сәттерде әр тарап өз мүддесін қорғауға тырысады. Алайда дау-дамайдың ұзаққа созылуы, әсіресе, сотқа дейін жетуі тараптардың уақыты мен қаражатын ғана емес, жүйке-жүйесін де сарқып тастайды. Осындай жағдайда бітімге келу – ең ұтымды, ең парасатты шешімдердің бірі болмақ.
Бітім – тек мәміле емес, түсіністік белгісі
Бітімге келу дегеніміз – тек екі тараптың өзара келісімге келуі ғана емес, бұл – түсіністікке ұмтылу, сабыр мен салиқалылықтың көрінісі. Кикілжіңді бейбіт жолмен шешу – өркениетті қоғамның белгісі. Екі жақ та өз ұстанымдарынан толықтай бас тартпай-ақ, ортақ мүдде таба алады. Осы арқылы қарым-қатынасты сақтап қалады, әрі болашақта туындауы мүмкін дау-жанжалдардың алдын алады.
Соттан тыс шешім – уақыт пен ресурс үнемі
Сот процесі – көп жағдайда ұзақ әрі күрделі үдеріс. Заңгерлік көмекке жүгіну, құжаттар дайындау, бірнеше тыңдалымдарға қатысу – бұның бәрі тараптардан шыдамдылық пен мол қаражат талап етеді. Ал егер дау бітім арқылы шешілсе, бұл барлық тарап үшін тиімді. Әсіресе, азаматтық істер мен отбасылық дауларда бітімгерлік – ең гуманистік жол.
С. Абсаматов
Түркістан облысының кәмелетке толмағандардың істері жөніндегі мамандандырылған ауданаралық сотының судьясы
