Маңғыстау облысында 10 адамның өмірін қиған жол апаты болды. Ішкі істер министрінің тапсырмасымен жедел штаб құрылды, — деп хабарлайды Massaget.kz тілшісі.
Штаб тәулік бойы жұмыс істейді.
«Министр қылмыстық істің тергеу барысын өз бақылауына алды. Қазір тергеу аясында жүргізушінің іс-қимылы, көліктің техникалық жағдайы, маршрут және тасымалдау шарттары тексеріліп жатыр», — деді ІІМ ресми өкілі — департамент бастығы Шыңғыс Әлекешев.
ІІМ мәліметінше, жолаушылар қасиетті Бекет атаға қажылық сапарға шыққан. Барлығы — Қазақстан азаматтары, әртүрлі өңірден келген. Зардап шеккендер ауруханаға жеткізілді, оларға медициналық көмек көрсетіліп жатыр.
«Жүргізушілерді жолда қауіпті жағдай тудырмас үшін шаршаған күйде рөлге отырмауға, көлікке артық жүк салмауға шақырамыз. Шаршаған жүргізушінің өзі үлкен апатқа себеп болуы мүмкін», — деді Шыңғыс Әлекешев.
