Банкрот деп танылған тұлғалардың нақты бір қызметтермен айналысуына тыйым салына ма? Бұл сауалға ҚР Қаржы бірінші вице-министрі Марат Сұлтанғазиев жауап берді, деп хабарлайды ҚазАқпарат тілшісі.
«Бастапқыда заң жобасында біз бұл мәселені талқылаған едік. Жекелеген қызмет түрімен айналысуға, айталық нотариус немесе адвокат болуға, заңды тұлға құруға шектеу ұсынылған-ды. Заңның соңғы жобасында мұндай шектеулер жоқ», — деді ол орталық коммуникациялар қызметіндегі брифинг барысында БАҚ өкілдерінің сауалына орай. Бірінші вице-министрдің атап өтуінше, бұл заң жобасы азаматтардың төлем қабілетін қалпына келтіруі және белсенді экономикалық өмірді бастауы үшін әзірленіп отыр. «Сол себепті шектеу қоймаймыз. Бірақ, жекелеген сарапшылар тарапынан банкрот болған тұлғаларға мемлекеттік қызметпен айналысуға, қаржы мекемелерінде қандай да лауазымда қызмет етуге тыйым салуға қатысты ұсыныстар бар. Бұл мәселелер әлі талқыланады», — деді Марат Сұлтанғазиев.
