БҚО бас мемлекеттік санитария дәрігерінің қолданыстағы қаулысына 9 сәуірден бастап күшіне енетін өзгерістер енгізілді. Құжатта тұрғындардың қозғалысын 00.00-ден 06.00-ге дейін шектеу туралы тармақ пайда болды, — деп хабарлайды Tengrinews.kz тілшісі.
Қаулыда бұл тыйымның кімге қолданылмайтыны көрсетілген.
Шұғыл түрде медициналық мекемеге, дәріханаға жеке автокөлікпен баруы қажет тұрғындар, сондай-ақ түнгі ауысымда жұмыс істейтін адамдар «109» телефоны бойынша өтінім қалдыруы немесе сайтта тіркелуі қажет.
Сонымен қатар, қаулыдағы карантин шарасына кейбір жеңілдіктер енгізілген. Сауда үйлері мен орталықтарына сенбіде жұмыс істеуге рұқсат етілді. Жұмыс уақыты: 10.00-ден 17.00-ге дейін, нысан сыйымдылығының 30 пайызынан аспайтын келушілерді қабылдай алады.
Айта кетейік, БҚО коронавирустың таралуы бойынша «қызыл» аймақта шамамен 20 күн бойы тұр.