18 мамыр – Халықаралық музей күні. Халықаралық музейлер кеңесі бұл атаулы күнді 1977 жылы бекіткен, деп хабарлайды Egemen.kz.
Музей күні 1978 жылдан бастап кәсіби мереке ретінде атап өтіліп келе жатыр. Бұл дата КСРО кезінде 1977 жылы Мәскеу қаласындағы Халықаралық музейлер кеңесінің ХІ Бас конференциясында бекітілген. Осы күні әлем елдеріндегі музейлерде музей түні акциясы ұйымдастырылады. 1997 жылы тұңғыш рет «Музей түні» шарасы Берлин қаласында өткізілген.
Ал Қазақстанда мұражай тарихы 1830 жылдан басталады. Орынборда жергілікті халықтың тарихы мен этнографиясын сипаттайтын мұралар негізінде 1831 жылы Неплюев әскери училищесі жанынан губерниялық мұражай ашылған.
Мұражайлар мәдени, тарихи және көркем мұраны сақтайды. Мұражайлар – әрбір адам баласы үшін демалыс және өзін-өзі жетілдіру орны. Мұражайсыз қоғамның интеллектуалдық, мәдени, білім беру деңгейін көтеру мүмкін емес.
Мәдениет және спорт министрлігінің ақпаратынша, қазір елімізде 275 музей бар. Сондай-ақ 12 республикалық музей-қорық бар.
Биыл еліміздің басты өнер музейі – Әбілхан Қастеев атындағы Мемлекеттік өнер музейінің құрылғанына 90 жыл толды. Жыл басында музейге «Ұлттық» мәртебесі берілді.
