«ҚазАвтоЖол» ҰК «АҚ Алматы қаласындағы «Алтын Орда» базарының маңындағы жол учаскесінде неге тиісті жол белгілері қойылмағанына жауап берді, — деп хабарлайды Tengrinews.kz тілшісі.
Айта кетейік, жол құрылысы өткен жылдың соңында аяқталған болатын.
Ұлттық компанияның мәліметінше, жол төсемінің жоғарғы қабаты әлі толық аяқталмаған.
«2021 жылдың қараша айында бас магистралды эстакада құрылысы аяқталған кезде уақытша жол таңбасы енгізілді. 2022 жылы асфальтбетон жабынының жоғарғы қабатын орнату бойынша жұмыстар жүргізілуіне байланысты уақытша белгі қойылмайды. Тұрақты жол белгілерін салу жұмыстары жұмыс толық аяқталғаннан кейін жүргізілетін болады», — деп хабарлады «Қазавтожол».
Сонымен қатар компания салынған жол бойындағы қоқысты кім тазарту керектігін айтты.
«Аталған жол бойында бірқатар ірі базарлар мен сауда орталықтары орналасқан. «ҚазАвтоЖол «ҰК» АҚ Алматы облыстық филиалы күн сайын бөлу жолағындағы қоқыстарды жинау жұмыстарын жүргізіп жатыр. Жолдың оңтүстік жағы Алматы қаласының аумағына, солтүстік жағы Алматы облысының Қарасай ауданына жатады», — деді компанияның баспасөз хатшысы Ләззат Стамғазиева.
