Ішкі істер министрі Ерлан Тұрғымбаев қызмет барысында қаза тапқан қызметкерлердің отбасына заң бойынша қандай көмек көрсетілетінін айтты, — деп хабарлайды Tengrinews.kz тілшісі.
Ерлан Тұрғымбаев қаңтарда террористер қолынан полицейлер мен Ұлттық ұланның сегіз қызметкері қаза тапқанын, 2911-і жарақат алғанын атап өтті. Ерлікпен қаза тапқандар II және III дәрежелі «Айбын» орденімен марапатталған. Олардың отбасына жан-жақты көмек көрсетілді.
«Одан бөлек, заң бойынша, қызметтік міндетін атқару барысында қайтыс болған қызметкерлердің отбасына 5 жыл ақшалай өтемақы, сондай-ақ жерлеу үшін 3 айлық өтемақы төленеді», — деді Тұрғымбаев Үкімет отырысында.
Еске салайық, 2 қаңтарда Маңғыстау облысының тұрғындары сұйытылған мұнай газы қымбаттауына байланысты митингіге шыққан болатын. 3 қаңтарда бірден бірнеше облыста митингілер басталды. Наразылық шарасына мұнай өндіруші кәсіпорындардың жұмысшылары да қосылды. 4 қаңтарда өзге де қалаларда бірден жаппай тәртіпсіздік басталды.
